26 | 05 | 2018

9 მაისი ლანჩხუთში

ფაშიზმზე გამარჯვების 73-ე წლისთავი ლანჩხუთშიც აღინიშნა. მეორე მსოფლიო ომის მონაწილე ვეტერანებიდან ცოცხალი მხოლოდ ცხრაღაა და ამათგანაც საზეიმო ღონისძიებებზე დასწრება მხოლოდ ოთხმა შეძლო. ქალაქის ცენტრში ვეტერანებს ადგილობრივი ხელისუფლების ხელმძღვანელი პირები, მუნიციპალიტეტის მერი ალექსანდრე სარიშვილი, საკრებულოს თავმჯდომარე ბესიკ ტაბიძე და სხვა წარმომადგენლები შეხვდნენ. ამის შემდეგ გვირგვინით შეამკეს ჩიბათში გმირთა მემორიალი, სადაც ვეტერანებმა გაიხსენეს განვლილი წლები. ითქვა, რომ ლანჩხუთიდან მეორე მსოფლიო ომში რვა ათასზე მეტი ადამიანი იბრძოდა, რომელთაგან სამი ათასი შინ ვერ დაბრუნდა. საღამო დასრულდა საზეიმო კონცერტითა და ბანკეტით რესტორან "ბაბუნაში", სადაც მხარეთმცოდნეობის მუზეუმში დაცული იმდროინდელი ექსპონატებიც იყო გამოფენილი. ვეტერანებმა მადლობა გადაუხადეს ადგილობრივი ხელისუფლების წარმომადგენლებს იმისთვის, რომ მათ არ ივიწყებენ. შეგახსენებთ, რომ ადგილობრივი ხელისუფლების მიერ მეორე მსოფლიო ომში მონაწილე თითოეულ ვეტერანს პირად ანგარიშზე 300-300 ლარი ჩაერიცხა. იმავე დღეს ლანჩხუთის მუნიციპალიტეტის მერმა და საკრებულოს თავმჯდომარემ მეორე მსოფლიო ომის ორი ვეტერანი სახლში მოინახულეს, მიულოცეს 9 მაისი და ჯანმრთელობა უსურვეს.


საკრებულოს თავმჯდომარე ბიუროს წევრებს შეხვდა

დღეს ლანჩხუთის მუნიციპალიტეტის საკრებულოს თავმჯდომარემ, ბესიკ ტაბიძემ ბიუროს წევრებთან მორიგი სამუშაო შეხვედრა გამართა, სადაც აქტუალურ საკითხებზე იმსჯელეს. როგორც აღინიშნა, აქტიურ ფაზაშია აზიურ ფაროსანას წინააღმდეგ გასატარებელი ღონისძიებები. საკრებულოს თავმჯდომარემ აღნიშნა, რომ ამ პროცესებში თითოეული მაჟორიტარი დეპუტატის მაქსიმალური ჩართულობაა აუცილებელი, რათა მოსახლეობა დროულად იყოს ინფორმირებული სამუშაოების დაწყების შესახებ. გარდა ამისა, შეხვედრაზე აღინიშნა, რომ ნიგოითის ადმინისტრაციულ ერთეულში მოსაგვარებელია წყლის პრობლემა. ასევე, ჟორდანიას ქუჩის გასწვრივ მდებარე ხეები საჭიროებს გადაბელვას.


სპორტი ბარიერების გარეშე

ლანჩხუთში დაიწყო პროექტი „სპორტი ბარიერების გარეშე“, რომელიც სპორტის ოთხ სახეობაში ტარდება 2002-2004 წლებში დაბადებულ ბავშვთა შორის. დღეს პირველი შეჯიბრი ჩატარდა სპრინტში, 60 მეტრზე გარბენში გოგონებსა და ვაჟებს შორის. ადგილები გოგონებს შორის ასე გადანაწილდა: პირველი ადგილი - ჩიბათის საჯარო სკოლა; მეორე ადგილი - აცანის საჯარო სკოლა და მესამე ადგილი - ჩოჩხათის საჯარო სკოლა. ვაჟებს შორის კი პირველადგილოსანი ნიგოითის საჯარო სკოლა გახდა. ჩიბათი ამჯერად მეორე გავიდა, ხოლო საპაიო მესამე ადგილი შრომისუბნის საჯარო სკოლას ერგო. პროექტ „სპორტი ბარიერების გარეშე“ მუნიციპალური ტურნირის გამარჯვებულები რეგიონულ გათამაშებაში მიიღებენ მონაწილეობას, ხოლო რეგიონის გამარჯვებული ანაკლიაში, საქართველოს ჩემპიონობაზე იასპარეზებს.


მერმა ინფრასტრუქტურული სამუშაოები მოინახულა

დღეს ლანჩხუთის მუნიციპალიტეტის მერმა, ალექსანდრე სარიშვილმა, საკრებულოს თავმჯდომარე ბესიკ ტაბიძემ, საკრებულოს ინფრასტრუქტურის კომისიის თავმჯდომარე გიგი გვარჯალაძემ და ფრაქცია "ქართული ოცნების" თავმჯდომარე ბესიკ კუპრაძემ გვიმბალაურსა და ჩიბათში მიმდინარე ინფრასტრუქტურული სამუშაოები მოინახულეს. სტიქიის შედეგად დაზიანებულ ადგილებში გაბიონებს შპს "პალადა" აკეთებს. ადგილობრივი ხელისუფლების წარმომადგენლები ნანახით კმაყოფილები დარჩნენ. კმაყოფილება გამოთქვა ადგილობრივმა მოსახლეობამაც.


მუნიციპალიტეტის მერი ჯურუყვეთელებს შეხვდა

ლანჩხუთის მუნიციპალიტეტის მერი, ალექსანდრე სარიშვილი, საკრებულოს თავმჯდომარე ბესიკ ტაბიძე და ადგილობრივი ხელისუფლების სხვა წარმომადგენლები ჯურუყვეთის ადმინისტრაციულ ერთეულში შემავალი სოფლების მაცხოვრებლებს შეხვდნენ. მერმა თავდაპირველად სოფლის ადმინისტრაციულ შენობაში მიიღო ჯურუყვეთელები, მოისმინა მათი პრობლემები, ადგილზე გაეცნო არსებულ ვითარებას. სტუმრებმა მოინახულეს ხიდი, რომელიც აუცილებლად აღსადგენია; გზა, რომელიც საჭიროებს შეკათებას. დაათვალიერეს რამდენიმე ადგილობრივი მოსახლის საცხოვრებელი სახლი. - კარგია, რომ ადგილობრივი ხელისუფლება ადგილზე ეცნობა ვითარებას. ჩვენ ეს იმედს გვაძლევს. მადლობა მათ იმისთვის, რომ არ დაიზარეს და ჩამოვიდნენ, - გვითხრეს ჯურუყვეთელებმა.


საზოგადოებრივი ცენტრი ლანჩხუთში

ლანჩხუთში, თბილისის ქუჩაზე, იუსტიციის სამინისტროს გადაწყვეტილებით, ახალი საზოგადოებრივი ცენტრი აშენდა, რომელიც დღეს თავად იუსტიციის მინისტრმა თეა წულუკიანმა გახსნა. ცენტრის გახსნას გურიის გუბერნატორი მერაბ ჭანუყვაძე, ადგილობრივი ხელისუფლების ხელმძღვანელი პირები და ადგილობრივი ხელისუფლების სხვა წარმომადგენლებიც ესწრებოდნენ. ცენტრს თანამედროვე სტანდარტების შესაბამისი ინფრტასტრუქტურა აქვს და აღჭურვილია ასევე თანამედროვე ტექნიკით. ლანჩხუთელები ამიერიდან კომფორტულ გარემოშ 200-ზე მეტი მომსახურების მიღებას შეძლებენ. "მინდა ყველას მოგილოცოთ დღევანდელი დღე. ვიცი, რომ თქვენც გიხარიათ, რადგა 200-ზე მეტი მომსახურების მიღება ასეთ კარგ გარემოში შეგეძლებათ" - მიმართა შეკრებილ მოსახლეობას თეა წულუკიანმა. "მინდა თითოეულ ლანჩხუთელს მივულოცო ამ ცენტრის გახსნა, რომელიც ყველა მომხმარებელზეა მორგებული" - განაცხადა მერმა, ალექსანდრე სარიშვილმა.


ქვეკატეგორიები

საჯარო ინფორმაცია
სმს გამოწერა